வரலாற்றுத் திருப்புமுனை: வெர்சாய் அரண்மனையில் ஈரானுடன் அமைதி ஒப்பந்தத்தில் கையெழுத்திட்டார் டொனால்ட் டிரம்ப்!

கடந்த பெப்ரவரி 28 அன்று அமெரிக்காவும் இஸ்ரேலும் ஈரானுக்கு எதிராகத் தொடங்கிய கடுமையான போரினால், ஈரானிலும் லெபனானிலும் பல்லாயிரக்கணக்கான மக்கள் உயிரிழந்தனர்.

சர்வதேச அரசியல் அரங்கில் எவரும் எதிர்பாராத அதிரடித் திருப்புமுனையாக, அமெரிக்க அதிபர் டொனால்ட் டிரம்ப் மற்றும் ஈரான் அதிபர் மசூத் பெசெஷ்கியன் ஆகியோர் இரு நாடுகளுக்கும் இடையேயான வரலாற்றுச் சிறப்புமிக்க அமைதி உடன்படிக்கையில் மின்னணு முறையில் கையெழுத்திட்டுள்ளனர். பிரான்சின் புகழ்பெற்ற வெர்சாய் அரண்மனையில் பிரெஞ்சு அதிபர் இம்மானுவேல் மக்ரோனுடனான அதிகாரப்பூர்வ சந்திப்பிற்குப் பிறகு, அமெரிக்க அதிபர் டொனால்ட் டிரம்ப் இத்தகவலை வெளியிட்டு உலகை ஆச்சரியத்தில் ஆழ்த்தியுள்ளார்.

கடந்த பெப்ரவரி 28 அன்று அமெரிக்காவும் இஸ்ரேலும் ஈரானுக்கு எதிராகத் தொடங்கிய கடுமையான போரினால், ஈரானிலும் லெபனானிலும் பல்லாயிரக்கணக்கான மக்கள் உயிரிழந்தனர். உலகப் பொருளாதாரத்தைப் பெரிதும் உலுக்கிய இந்த உக்கிரமான மோதலுக்கு முற்றுப்புள்ளி வைக்கும் வகையில் இந்தத் தற்காலிக அமைதி ஒப்பந்தம் தற்போது எட்டப்பட்டுள்ளது. இவ்வொப்பந்தத்தின்படி, உலகக் கப்பல் போக்குவரத்திற்கு மிக முக்கியமாக விளங்கும் 'ஹோர்முஸ் நீரிணை' (Strait of Hormuz) உடனடியாகத் திறந்துவிடப்படும் என்றும், ஈரானியத் துறைமுகங்கள் மீதான அமெரிக்காவின் கடற்படை முற்றுகை உடனடியாக முடிவுக்கு வரும் என்றும் அறிவிக்கப்பட்டுள்ளது. இம்முக்கிய உடன்படிக்கையை அதிகாரப்பூர்வமாகக் கொண்டாடுவதற்கும், அடுத்தகட்ட தொழில்நுட்பக் குழுக்களின் ஆலோசனைகளைத் தொடங்குவதற்கும் நாளை வெள்ளிக்கிழமை (ஜூன் 19) சுவிட்சர்லாந்தில் ஒரு சிறப்பு நிகழ்வு நடைபெறவுள்ளது.

இந்த உடன்படிக்கையின் முதன்மை விதிகளின்படி, ஈரான் தனது வசம் உள்ள செறிவூட்டப்பட்ட யுரேனியத்தின் அளவை முழுமையாகக் குறைத்துக்கொள்ள ஒப்புக்கொண்டுள்ளது. சர்வதேச அணுசக்தி முகமையின் (IAEA) நேரடிக் கண்காணிப்பில் அடுத்த இரண்டு மாதங்களுக்குள் இந்த யுரேனியக் குறைப்பு நடவடிக்கைகள் ஈரானிலேயே மேற்கொள்ளப்படும். இதற்குப் பிரதிபலனாக, ஈரான் மீதான கச்சா எண்ணெய் விற்பனைக் கட்டுப்பாடுகள் உட்பட அனைத்துப் பொருளாதாரத் தடைகளையும் அமெரிக்கா உடனடியாக நிறுத்தி வைக்கிறது. அடுத்த 60 நாட்களுக்குள் இரு நாடுகளுக்கும் இடையே இறுதி உடன்படிக்கை எட்டப்படும் பட்சத்தில், அனைத்துப் பொருளாதாரத் தடைகளும் நிரந்தரமாக நீக்கப்படும் எனத் தெரிவிக்கப்பட்டுள்ளது.
இந்த அமைதி ஒப்பந்தத்தில் லெபனான் எல்லையில் நிலவி வரும் போர்ப் பதற்றத்தைத் தணிப்பதற்கான விதிகளும் சேர்க்கப்பட்டுள்ளன. இதனை வரவேற்றுள்ள லெபனானின் ஹெஸ்பொல்லா அமைப்பின் பொதுச் செயலாளர் நைம் காசிம், இது ஈரானின் பிடிவாதத்திற்கு கிடைத்த மாபெரும் வெற்றி என்று குறிப்பிட்டுள்ளார். எனினும், லெபனான் அதிபர் ஜோசப் அவூன், இஸ்ரேலுடனான தங்களது நேரடிப் பேச்சுவார்த்தைகள் இந்த அமெரிக்க-ஈரான் ஒப்பந்தத்தைச் சார்ந்தது அல்ல, அது தனித்தன்மை வாய்ந்தது என்று தெளிவுபடுத்தியுள்ளார்.

இறுதி ஒப்பந்தம் வெற்றிகரமாக நிறைவேறும்பொழுது, போரினால் கடுமையாகப் பாதிக்கப்பட்ட ஈரானின் மறுசீரமைப்பு மற்றும் பொருளாதார வளர்ச்சிக்காக, வளைகுடா நாடுகள் உள்ளிட்ட பிராந்தியக் கூட்டாளிகளின் ஒத்துழைப்போடு 300 பில்லியன் டாலர் மதிப்பிலான மாபெரும் நிதியுதவியை வழங்க அமெரிக்கா வழிவகை செய்யும். அதேவேளையில், போர்ச் சூழலுக்கு முந்தைய நிலைக்கு மாறாக, ஹோர்முஸ் நீரிணையை இனி கடந்து செல்லும் சர்வதேசக் கப்பல்களுக்குப் போக்குவரத்துச் சேவைக்கான பிரத்தியேகக் கட்டணத்தை வசூலிக்கப் போவதாக ஈரானிய முதன்மைப் பேச்சாளர் முகமது பாகர் காலிபாஃப் தெரிவித்துள்ளார்.

இந்த வரலாற்றுச் சிறப்புமிக்க அமைதி உடன்படிக்கையை பிரான்சில் கூடி விவாதித்த ஜி7 (G7) அமைப்பின் உறுப்பு நாடுகள் ஒருமனதாக வரவேற்றுள்ளன. ஈரானின் அணு ஆயுதப் பெருக்கத்தைத் தடுக்க இது ஒரு வரலாற்று வாய்ப்பு என்று அவர்கள் பாராட்டியுள்ளனர். இந்த அமைதிச் செய்தியின் எதிரொலியாகச் சர்வதேசச் சந்தையில் கச்சா எண்ணெயின் விலை கணிசமாகச் சரிவடைந்துள்ளது. உலகளாவிய கச்சா எண்ணெய் விலை குறியீடான பிரெண்ட் (Brent) தரம், பேரல் ஒன்றுக்கு 1.47% குறைந்து 78.38 டாலராக வர்த்தகமாகி வருகிறது.

- சிவா சின்னப்பொடி