பாரிஸ் பெற்றோர்களுக்கு அதிர்ச்சி! பள்ளிகள் மூடப்படும் அபாயம்...
பாரிஸ் நகர நிர்வாகம் சில சலுகைகளை அறிவித்தாலும், தொழிற்சங்கங்கள் அதை "போதுமானதாக இல்லை" (loin du compte) என்று நிராகரித்துவிட்டன.
பாரிஸ் பெற்றோர்களுக்கு அதிர்ச்சி! பள்ளிகள் மூடப்படும் அபாயம்...
பாரிஸில் உள்ள பல பெற்றோர்கள் தற்போது பெரும் குழப்பத்திலும் பதற்றத்திலும் உள்ளனர்.அதற்குக் காரணம் பள்ளிகளில், பாட நேரங்கள் தவிர மற்ற நேரங்களில் (périscolaires) குழந்தைகளைக் கவனித்துக் கொள்ளும் பள்ளி உதவியாளர்கள் மாபெரும் தொடர் வேலைநிறுத்தப் போராட்டத்தில் ஈடுபட்டுள்ளனர்.
நவம்பர் 21 ஆம் திகதி வரை நீடிக்கும் என அறிவிக்கப்பட்டுள்ள இந்தப் போராட்டத்தால், பாரிஸ் பள்ளிகளின் இயல்பு வாழ்க்கை ஆட்டம் கண்டுள்ளது.
கடந்த திங்கள்கிழமை (நவம்பர் 10) அன்று மட்டும், தொழிற்சங்கங்களின் கணக்குப்படி சுமார் 200 பள்ளிகளிலும், நகர நிர்வாகத்தின் (Mairie) கணக்குப்படி 119 பள்ளிகளிலும் மதிய உணவுக் கூடங்கள் (Canteens) மூடப்பட்டன.
பல பள்ளிகளில் மிகக் குறைந்த ஊழியர்களே பணிக்கு வந்ததால், குழந்தைகளின் பாதுகாப்பு மற்றும் கவனிப்பு விகிதம் (taux d'encadrement) வழக்கத்தைவிட "மிகவும் மோசமான" நிலைக்குத் தள்ளப்பட்டதாகத் தொழிற்சங்கங்கள் கூறுகின்றன.
ஏன் இந்தப் போராட்டம்?
இந்தப் போராட்டத்தின் பின்னணியில் கடுமையான கோரிக்கைகள் உள்ளன:
ஆட்பற்றாக்குறை மற்றும் சோர்வு: இந்தப் பணியில் நிரந்தர ஊழியர்களைவிட (2,500 பேர்) தற்காலிக (Vacataires) ஊழியர்களே (8,500 பேர்) மிக அதிகமாக உள்ளனர். இதனால் இருக்கும் ஊழியர்கள் "கடும் பணிச்சுமையிலும் சோர்விலும்" (épuisées) இருப்பதாகக் கூறுகின்றனர்.
பாதுகாப்பு சீர்குலைவு: ஊழியர் பற்றாக்குறையால் குழந்தைகளின் கவனிப்புத் தரம் (conditions d'accueil) நாளுக்கு நாள் மோசமடைந்து வருவதாக அவர்கள் குற்றம் சாட்டுகின்றனர்.
பயிற்சி இன்மை: மாற்றுத்திறனாளி குழந்தைகள் போன்ற சிறப்புக் கவனம் தேவைப்படும் குழந்தைகளுக்குத் தனிக் கவனிப்பாளர்கள் இல்லை.
அதிர்ச்சி அளிக்கும் பாலியல் குற்றச்சாட்டுப் பின்னணி
இந்த வேலைநிறுத்தத்தின் பின்னணியில் மற்றொரு தீவிரமான பிரச்சனையும் உள்ளது. பாலியல் வன்முறைத் தடுப்புப் பயிற்சி (prévention des violences sexistes et sexuelles) என்பது மேலாளர்களுக்கு மட்டுமின்றி, குழந்தைகளுடன் நேரடியாகப் பழகும் அனைத்து ஊழியர்களுக்கும் வழங்கப்பட வேண்டும் என்பது இவர்களின் முக்கிய கோரிக்கைகளில் ஒன்று.
ஏனெனில், இந்த 2025 ஆம் ஆண்டில் மட்டும், பாரிஸின் 11வது நிர்வாகப்பிரிவில் 5 பள்ளி அனிமேட்டர்கள் "பாலியல் ரீதியான சந்தேகத்தின் பேரில் இடைநீக்கம் செய்யப்பட்டுள்ளனர். மொத்தமாகப் பாரிஸில் 16 ஊழியர்கள் இது போன்ற சந்தேகத்தின் பேரில் இடைநீக்கம் செய்யப்பட்டுள்ளது குறிப்பிடத்தக்கது. இது பெற்றோரிடையே பெரும் பதற்றத்தை ஏற்படுத்தியுள்ளது.
பாரிஸ் நகர நிர்வாகம் சில சலுகைகளை அறிவித்தாலும், தொழிற்சங்கங்கள் அதை "போதுமானதாக இல்லை" (loin du compte) என்று நிராகரித்துவிட்டன.
"இது ஒரு வரலாற்று சிறப்புமிக்க நீண்ட வேலைநிறுத்தம்" என்று கூறும் தொழிற்சங்கங்கள், பாரிஸ் நகர நிர்வாகம் தங்கள் கோரிக்கைகளை ஏற்காவிட்டால், இந்த வேலைநிறுத்தத்தை டிசம்பர் 31 வரை நீட்டிக்கவும், தேவைப்பட்டால் 2026-லும் தொடரவும் (renouvelable) தயங்க மாட்டோம் என்று கடுமையாக எச்சரித்துள்ளன.
