கழுத்தளவு தண்ணீர்; குழந்தையை மீட்ட நிஜ பாகுபலி !

.

விழுப்புரம் மாவட்டம், தேவனூர் கிராமத்தில் ஏற்பட்ட வெள்ளத்தின் போது, கழுத்தளவு தண்ணீரில் குழந்தையை மீட்ட இளைஞரின் வீடியோ சமூக வலைதளத்தில் வைரலாகி வருகிறது.வங்கக்கடலில் உருவான ஃபெஞ்சல் புயலின் எதிரொலியாகத் தமிழ்நாட்டில் பல்வேறு பகுதிகளில் தொடர் மழை பெய்தது. அதனால், ஏற்பட்ட வெள்ளம் காரணமாக மக்கள் தங்களது இயல்பு வாழ்க்கையை இழந்து தவித்து வருகின்றனர்.

இந்த நிலையில், வெள்ளத்தில் சிக்கித் தவித்த 3 மாத குழந்தையை இளைஞர் ஒருவர், கழுத்தளவு தண்ணீரில் தலையில் வைத்து மீட்ட காட்சி இணையத்தில் வைரலாகி வருகிறது. இந்த நிலையில், குழந்தையை சாதூர்யமாக மீட்ட இளைஞரைப் பலரும் பாராட்டி வருகின்றனர்.விழுப்புரம் மாவட்டம், தேவனூர் கிராமத்தில் உள்ள சின்ன கவுண்டர் பகுதியில் 20க்கும் மேற்பட்ட குடியிருப்புகள் உள்ளது. இந்த பகுதியில் நேற்று (நவ.3) மழை வெள்ளத்தின் காரணமாக முதல் தளம் வரை வெள்ளநீர் சென்று கொண்டு இருந்தது.

இதனால் அந்த பகுதியிலிருந்த மக்கள் அனைவரும் மொட்டை மாடியில் தஞ்சம் புகுந்தனர்.இந்த நிலையில் நேற்று மாலை வெள்ளநீர் சற்று வடிந்ததை அடுத்து, அங்கிருந்த மக்களை மீட்கும் பணியில் அதே பகுதியைச் சேர்ந்த இளைஞர்கள் பலர் ஈடுபட்டனர். அப்போது அந்த பகுதியில் வசிக்கும் பகுத்தறிவு, ரம்யா தம்பதியினரின் 3 மாத கைக்குழந்தையுடன் மொட்டை மாடியில் தஞ்சம் புகுந்திருந்துள்ளனர். அதனைக் கண்ட பெயிண்டர் ஆக வேலை செய்யும் ஆறுமுகம் என்ற இளைஞர் துரிதமாகச் செயல்பட்டு, கயிறு கட்டி குழந்தையைப் பெரிய அளவிலான அலுமினியப் பாத்திரத்தில் (அன்னக்கூடை) வைத்து மீட்டுள்ளார்.