பத்ம பூஷன் விருது பெறும் அஜித்குமாருக்கு வாழ்த்து சொன்ன ரஜினிகாந்த்!

.

நடிகர் அஜித்குமாருக்கு பத்ம பூஷன் விருது அறிவிக்கப்பட்ட நிலையில் நடிகர் ரஜினிகாந்த் வாழ்த்து தெரிவித்துள்ளார். ‘வேட்டையன்’ படத்தை தொடர்ந்து நடிகர் ரஜினிகாந்த் இயக்குநர் லோகேஷ் கனகராஜ் இயக்கத்தில் ’கூலி’ திரைப்படத்தில் நடித்து வருகிறார். இந்தப் படத்துக்கு அனிருத் இசையமைக்கிறார். சௌபின் சாஹிர், நாகர்ஜுனா, உபேந்திரா, சத்யராஜ், ஸ்ருதிஹாசன் உள்ளிட்ட பலர் நடிக்கின்றனர். படத்தை சன் பிக்சர்ஸ் நிறுவனம் தயாரிக்கிறது.

இத்திரைப்படத்தின் படப்பிடிப்பு பல்வேறு இடங்களில் பல்வேறு கட்டங்களாக நடைபெற்று வருகிறது. இந்நிலையில் நடிகர் ரஜினிகாந்த் கடந்த ஜனவரி 7ஆம் தேதியன்று அதிகாலை தாய்லாந்திற்கு கிளம்பிச் சென்று, அங்கு ’கூலி’ திரைப்படத்தின் படப்பிடிப்பில் 20 நாட்கள் பங்கேற்று முடித்துவிட்டு விமான மூலம் நேற்று நள்ளிரவு சென்னை திரும்பினார்.  

சென்னை விமான நிலையத்தில் நடிகர் ரஜினிகாந்துக்கு ரசிகர்கள் உற்சாக வரவேற்பு அளித்தனர். அப்போது ரசிகர் ஒருவர் ரஜினிகாந்தின் காலில் விழுந்து ஆசீர்வாதம் வாங்கினார். அப்போது அவரிடம் செய்தியாளர்கள் பேட்டி எடுக்க முயன்றனர். அப்போது அவரிடம், நடிகர் அஜித்குமாருக்கு பத்ம பூஷன் விருது அறிவிக்கப்பட்டுள்ளது குறித்து நடிகர் ரஜினிகாந்திடம் கேட்டபோது, வாழ்த்துகள் என தெரிவித்து விட்டு தனது காரில் ஏறி புறப்பட்டு சென்றார். முன்னதாக ரசிகர்கள் நடிகர் ரஜினிகாந்த் உடன் செல்போனில் புகைப்படம் எடுத்துக் கொண்டனர்.  

ஒவ்வொரு ஆண்டும் நமது நாட்டின் உயரிய விருதுகளான பத்ம விபூஷன், பத்ம பூஷன், பத்மஸ்ரீ ஆகிய விருதுகள் குடியரசு தினத்தை முன்னிட்டு அறிவிக்கப்பட்டு அதன்பின் வழங்கப்பட்டு வருகின்றன. அந்த வகையில் இந்தாண்டு பத்ம விபூஷன் விருது 7 பேருக்கும், பத்ம பூஷன் விருது 19 பேருக்கும், பத்ம ஸ்ரீ விருது 113 பேருக்கும் என பல்வேறு துறைகளில் சிறந்து விளங்கிய 139 பேருக்கு விருதுகள் வழங்கப்பட உள்ளதாக மத்திய அரசு அறிவித்துள்ளது.

பத்ம பூஷன் விருது அறிவிக்கப்பட்ட 19 பேரில் தொழிலதிபர் நல்லி குப்புசாமி, நடிகர் அஜித் குமார், நடிகை ஷோபனா சந்திரசேகர் ஆகிய 3 பேர் தமிழ்நாட்டைச் சேர்ந்தவர்கள். பத்மஸ்ரீ விருது அறிவிக்கப்பட்ட 113 பேரில் குருவாயூர் துரை, புரிசை கண்ணப்பா சம்பந்தன், ராதாகிருஷ்ணன் தேவசேனாதிபதி, வேலு ஆசான் என ஆகியோர் உள்ளனர்.

‘கூலி’ திரைப்படத்திற்கு பிறகு நெல்சன் இயக்கும் ‘ஜெயிலர் 2’ படத்தில் நடிக்கிறார் ரஜினிகாந்த். இதன் அறிவிப்பு பொங்கலையொட்டி வெளியானது. இதன் படப்பிடிப்பு விரைவில் தொடங்குகிறது.