அவசர எச்சரிக்கை: 3 பச்சிளம் குழந்தைகள் கடத்தல்! தேடுதல் வேட்டையில் பிரான்ஸ் காவல்துறை!
அரசு உடனடியாக நாடு தழுவிய 'கடத்தல் எச்சரிக்கையை' (Alerte Enlèvement) விடுத்துள்ளது.
பிரான்ஸ் நாட்டை உலுக்கும் ஒரு பெரும் அதிர்ச்சிச் செய்தி இன்று (சனிக்கிழமை) காலை வெளியாகியுள்ளது. Epinay-sur-Seine நகரிலிருந்து மூன்று பச்சிளம் குழந்தைகள் கடத்தப்பட்டுள்ளனர். நிலைமையின் தீவிரத்தைக் கருத்தில் கொண்டு, அரசு உடனடியாக நாடு தழுவிய 'கடத்தல் எச்சரிக்கையை' (Alerte Enlèvement) விடுத்துள்ளது.
கடத்தப்பட்ட குழந்தைகள் யார்?
டாலியா: வெறும் ஆறு வாரங்களே ஆன குறைமாதக் குழந்தை. இவளுக்குப் பிறவியிலேயே இதயக் கோளாறு உள்ளதால், அடுத்த 48 மணி நேரத்திற்குள் அவசர மருத்துவச் சிகிச்சை அளிக்கப்பட வேண்டியது கட்டாயம்!
நயேல் (18 மாதங்கள்) & எலின் (இரண்டரை வயது): இவர்கள் இருவரும் அரசு குழந்தைகள் நல அமைப்பின் பாதுகாப்பில் இருந்த நிலையில், டாலியாவுடன் சேர்த்து ஒரே நேரத்தில் கடத்தப்பட்டுள்ளனர்.
பெற்றோர் மீதே சந்தேகம்!
இந்தக் கடத்தல் செயலைச் செய்தது வேறு யாருமல்ல, அவர்களின் சொந்தப் பெற்றோர்களேதான் எனக் காவல் துறை உறுதியாகச் சந்தேகிக்கிறது.
தந்தை: அப்தெல்காதர் பெனாப்தெர்ரஹ்மான் (வயது 24). நடுத்தர உடல்வாகு கொண்ட இவரது முகத்தில் நகக்கீறல் தழும்புகள் இருக்கலாம்.
தாய்: சைமா ஹத்தாப் (வயது 20). நடுத்தர உடல்வாகு கொண்டவர்.
இவர்கள் குழந்தைகளுடன் நாட்டை விட்டுத் தப்பியோட அதிக வாய்ப்புள்ளதாக அதிகாரிகள் எச்சரித்துள்ளனர். நீதி அமைச்சகம் இவர்களது புகைப்படங்களை வெளியிட்டுத் தேடுதல் வேட்டையைத் தீவிரப்படுத்தியுள்ளது.
இந்தச் சந்தேக நபர்களையோ அல்லது குழந்தைகளையோ நீங்கள் எங்குப் பார்த்தாலும், நீங்களாகவே அவர்களைப் பிடிக்கவோ குறுக்கிடவோ முயற்சிக்க வேண்டாம்.
உடனடியாக 197 என்ற அவசரக் காவல் துறை எண்ணிற்குத் தொடர்புகொள்ளுங்கள்.
அல்லது alerte-enlevement@interieur.gouv.fr என்ற முகவரிக்கு மின்னஞ்சல் அனுப்புங்கள்.
