இந்தியப்படைகளின் யாழ் பிரம்படிப் படுகொலை!
38 ஆண்டுகள் கடந்தும் மறையாத ரணமும், மறுக்கப்படும் நீதியும்!
இந்தியப்படைகளின் யாழ் பிரம்படிப் படுகொலை.38 ஆண்டுகள் கடந்தும் மறையாத ரணமும், மறுக்கப்படும் நீதியும்!
யாழ்ப்பாணம், இலங்கை:1987 ஆம் ஆண்டு ஒக்டோபர் மாதம் இந்திய அமைதிப் படையின் (IPKF) 'ஒப்பரேசன் பவன்' நடவடிக்கையின்போது, யாழ்ப்பாணம் கொக்குவில் பிரம்படி வீதியில் 50க்கும் மேற்பட்ட அப்பாவித் தமிழ் மக்கள் கொல்லப்பட்ட கொடூரமான சம்பவம் இன்று 38 ஆண்டுகளைக் கடந்துள்ள நிலையில், பாதிக்கப்பட்ட குடும்பங்களுக்கான நீதி இன்னும் எட்டாக்கனியாகவே உள்ளது.
ஈழத் தமிழர் வரலாற்றில் இந்திய இராணுவத்தால் நிகழ்த்தப்பட்ட முதல் படுகொலைச் சம்பவங்களில் ஒன்றாகக் கருதப்படும் இந்த பிரம்படிப் படுகொலை, ஒக்டோபர் 11 மற்றும் 12 ஆகிய தினங்களில் இடம்பெற்றது.
நிகழ்ந்த துயரம் என்ன?
அன்றைய தினம், இந்திய அமைதிப்படையின் இராணுவத்தினர் பிரம்படி வீதி மற்றும் தலையாழிப் பகுதிகளில் தாக்குதல் நடத்தியபோது, பொது மக்கள் பலர் சரமாரியாகச் சுடப்பட்டனர். மேலும், பலர் உயிருடன் வீதியிலும், ரயில் தண்டவாளங்களிலும் குப்புறப் படுக்க வைக்கப்பட்டு, இராணுவத்தின் கவச வாகனங்களால் நசுக்கிக் கொல்லப்பட்டதாக நேரடிச் சாட்சிகள் மற்றும் ஆவணங்கள் தெரிவிக்கின்றன.
இந்திய-இலங்கை ஒப்பந்தத்தின்படி அமைதியைக் காக்க வந்த 'அமைதிப்படை', சில மாதங்களிலேயே இவ்வாறு வன்முறைத் தாக்குதல்களைத் தொடுத்தது, தமிழ் மக்கள் மத்தியில் பெரும் அதிர்ச்சியையும் நம்பிக்கைத் துரோகத்தையும் ஏற்படுத்தியது.
நீதி வேண்டி நிற்கும் மக்கள்.
இந்தப் படுகொலையில் தங்கள் உறவுகளை இழந்த குடும்பங்களும், உயிர் தப்பியவர்களும் கடந்த பல தசாப்தங்களாக நீதி கேட்டுப் போராடி வருகின்றனர். ஆனால், இந்தியா தனது இராணுவத்தின் இந்த அட்டூழியங்கள் குறித்து இதுவரை அதிகாரபூர்வமான வருத்தத்தையோ அல்லது மன்னிப்பையோவெளிப்படுத்தவில்லை.
யாழ்ப்பாணம் பலாலியில் இந்திய இராணுவ வீரர்களுக்காக அமைக்கப்பட்டுள்ள நினைவுச் சின்னத்தில் இந்தியத் தூதுவர்கள் அஞ்சலி செலுத்தும்போதும், பிரம்படி உட்பட இந்திய அமைதிப்படையால் கொல்லப்பட்ட அப்பாவித் தமிழ் மக்களின் இழப்புகளுக்காக ஒரு சிறு இரங்கல் செய்தியையோகூட வெளியிடவில்லை என்ற விமர்சனம் தமிழ் அரசியல் தரப்பினரிடையே வலுவாக உள்ளது.
இந்தத் துயரச் சம்பவத்தில் கொல்லப்பட்ட பொதுமக்களுக்கு நீதி கிடைப்பதும், பொறுப்புக்கூறல் நிலைநாட்டப்படுவதும், இந்த சம்பவங்கள் மீதான உண்மை கண்டறியும் விசாரணைக்கு இந்தியா ஒத்துழைப்பு வழங்குவதும் காலத்தின் கட்டாயமாக நீடிக்கிறது.
தொடர்ந்து அனுஷ்டிக்கப்படும் நினைவேந்தல் இந்த ஆண்டு ஒக்டோபர் 11 மற்றும் 12 ஆகிய தினங்களிலும், கொக்குவில் பிரம்படிச் சந்தியில் அமைந்துள்ள நினைவுத் தூபியில், படுகொலை செய்யப்பட்ட மக்களுக்கு அஞ்சலி செலுத்தும் நிகழ்வுகள் உணர்வெழுச்சியுடன் அனுஷ்டிக்கப்படும் என ஏற்பாட்டாளர்கள் தெரிவித்துள்ளனர்.
