மத்திய கிழக்கில் போர் பதற்றம் நாளுக்கு நாள் அதிகரிப்பு!
தெற்கு லெபனானில் ஐ.நா வீரர் பலி!
மத்திய கிழக்கில் போர் பதற்றம் நாளுக்கு நாள் அதிகரித்து வரும் நிலையில், இன்று காலை 7:30 வரையிலான முக்கிய நிலவரங்கள்!
தாக்குதல்கள் மற்றும் உயிரிழப்புகள்.
லெபனானில் ஐ.நா வீரர் பலி: தெற்கு லெபனானில் (ஆட்சிட் எல்-குசைர் அருகே) நிகழ்ந்த மர்மமான வெடிகுண்டுத் தாக்குதலில் இந்தோனேசியாவைச் சேர்ந்த ஐ.நா அமைதிப்படை (FINUL) வீரர் ஒருவர் கொல்லப்பட்டார்; மற்றொருவர் படுகாயமடைந்தார். இந்தத் தாக்குதலை நடத்தியது யார் என்பது குறித்து ஐ.நா விசாரணை நடத்தி வருகிறது.
குவைத்தில் ஈரான் தாக்குதல்: குவைத் நாட்டில் உள்ள கடல்நீரைக் குடிநீராக்கும் மற்றும் மின்சாரம் தயாரிக்கும் ஆலை மீது ஈரான் நடத்திய தாக்குதலில் இந்தியத் தொழிலாளி ஒருவர் உயிரிழந்தார்.
ஈரான் மீது இஸ்ரேல் தாக்குதல்: ஈரான் தலைநகர் டெஹ்ரானில் உள்ள மக்கள் குடியிருப்புகள் மீது இஸ்ரேல் ராணுவம் அதிரடித் தாக்குதல் நடத்தியது. அதேசமயம், ஈரானில் இருந்து ஏவப்பட்ட பல ஏவுகணைகளை இஸ்ரேலின் வான்வெளிப் பாதுகாப்பு அமைப்புகள் இடைமறித்து அழித்துள்ளன.
ஈரான் அணு உலை செயலிழப்பு: கடந்த வாரம் இஸ்ரேல் நடத்திய தாக்குதலில், ஈரானின் 'அராக்' (Arak) பகுதியில் உள்ள கொண்டாப் கனநீர் அணு உலை (புளூட்டோனியம் தயாரிக்கும் தளம்) கடுமையாகச் சேதமடைந்துள்ளதாக சர்வதேச அணுசக்தி முகமை (IAEA) உறுதிப்படுத்தியுள்ளது.
சவுதியில் ஏவுகணைத் தாக்குதல்: சவுதி அரேபியாவின் கிழக்குப் பகுதியைக் குறிவைத்து ஏவப்பட்ட 5 பாலிஸ்டிக் ஏவுகணைகளைச் சவுதி ராணுவம் நடுவானிலேயே சுட்டு வீழ்த்தியது.
அமெரிக்காவின் நிலைப்பாடு மற்றும் எச்சரிக்கைகள்: எளிதாகக் கைப்பற்றுவோம்: ஈரானின் 90% கச்சா எண்ணெய் ஏற்றுமதிக்கு ஆதாரமாக விளங்கும் 'கார்க்' (Kharg) தீவை அமெரிக்க இராணுவம் மிக எளிதாகக் கைப்பற்ற முடியும் என அதிபர் டொனால்ட் டிரம்ப் கூறியுள்ளார்.
ஆட்சி மாற்றம்: ஈரானின் உயரிய தலைவர் அலி கமேனி மற்றும் முக்கியத் தலைவர்கள் கொல்லப்பட்டதால், ஈரானில் தாங்கள் நினைத்த 'ஆட்சி மாற்றம்' (Regime change) நிகழ்ந்துவிட்டதாக டிரம்ப் பெருமிதம் தெரிவித்துள்ளார்.
எண்ணெய் கப்பல்கள் தடையின்றிப் பயணிக்கும்: ஹார்முஸ் நீர்ச்சந்தியில் முடங்கியுள்ள 20 பிரம்மாண்டமான கச்சா எண்ணெய்க் கப்பல்கள், நாளை காலை முதல் எவ்விதத் தடையுமின்றிப் பயணிக்க அமெரிக்கா-ஈரான் இடையே பேச்சுவார்த்தை வெற்றி பெற்றுள்ளதாக டிரம்ப் உறுதியளித்துள்ளார்.
பொருளாதார மற்றும் பிற தாக்கங்கள்: எண்ணெய் விலை உயர்வு: மத்திய கிழக்குப் போர் காரணமாக உலகளவில் கச்சா எண்ணெய் விலை கடுமையாக உயர்ந்துள்ளது. WTI கச்சா எண்ணெய் பீப்பாய் 103 டொலர்களையும், பிரெண்ட் (Brent) கச்சா எண்ணெய் 115 டொலர்களையும் கடந்துள்ளது.
ஒஸ்ரேலியாவில் வரிக்குறைப்பு: உயரும் பெட்ரோல் விலையிலிருந்து மக்களைக் காக்க, ஒஸ்ரேலிய அரசு அடுத்த மூன்று மாதங்களுக்கு எரிபொருள் வரியை (லிட்டருக்கு 31 சென்ட்) பாதியாகக் குறைத்துள்ளது.
இங்கிலாந்தில் அவசர ஆலோசனை: போர் காரணமாக ஏற்படும் பொருளாதாரப் பாதிப்புகளைச் சமாளிக்க, பிரிட்டன் பிரதமர் கீர் ஸ்டார்மர் இன்று முன்னணி எண்ணெய் மற்றும் நிதி நிறுவனங்களின் தலைவர்களுடன் அவசர ஆலோசனை நடத்தவுள்ளார்.
இஸ்ரேல் பட்ஜெட் உயர்வு: பல முனைகளில் போர் நடந்து வருவதால், இஸ்ரேல் நாடாளுமன்றம் தனது ராணுவத்திற்கான பட்ஜெட்டை 142 பில்லியன் ஷெக்கல்களாக (சுமார் 8.3 பில்லியன் யூரோ) அதிரடியாக உயர்த்தியுள்ளது.
வழிபாட்டுத் தலங்களுக்கு அனுமதி: பாதுகாப்பு காரணங்களுக்காக நிறுத்தப்பட்டிருந்த ஜெருசலேம் புனித செபுல்கர் தேவாலயத்திற்கான (Saint-Sépulcre) அனுமதியை, லத்தீன் ஆயர் கார்டினல் பியர்பட்டிஸ்டாவிற்கு இஸ்ரேல் மீண்டும் வழங்கியுள்ளது
