பருத்தித்துறை பகுதிகளில் அமைந்துள்ள உணவகம் ஒன்றிற்கு எதிராக 40000 தண்டப்பணம்!

மீன்சந்தையில் மீன்வியாபாரம் செய்யும் போது வெற்றிலை மென்று பொதுவிடத்தில் எச்சில் உமிழ்ந்தவருக்கு 5000 தண்டப்பணம்.

பருத்தித்துறை நகரசபையின் ஆளுகைக்குட்பட்ட பகுதிகளில் அமைந்துள்ள உணவகம் ஒன்றிற்கு எதிராக பருத்தித்துறை நகரசபையின் பொது சுகாதார பரிசோதகரால் உடல்நலத்தகுதியை உறுதிப்படுத்தும் மருத்துவ சான்றிதழ் இல்லாமல் ஊழியர்களை உணவகத்தில் அனுமதித்தமை, தனிநபர் சுகாதாரம் பேணாமை, வெற்றிலை மென்ற வண்ணம் உணவினை கையாண்டமை தொடர்பாக முகாமையாளர் மற்றும் உணவு கையாளுபவரிற்கு எதிராக தாக்கல் செய்யப்பட்ட வழக்கானது  இன்றையதினம் விசாரணையின் பின்  (2025.08.22) பருத்தித்துறை நீதவான் நீதிமன்றத்தினால்  40000 தண்டப்பணம் விதிக்கப்பட்டமை குறிப்பிடத்தக்கது.

மேலும் பருத்தித்துறை நகர்ப்புறத்தில் அமைந்துள்ள மீன்சந்தையில் மீன்வியாபாரம் செய்யும் போது வெற்றிலை மென்று பொதுவிடத்தில் எச்சில் உமிழ்ந்தவருக்கு 5000 தண்டப்பணமும் அறவிடப்பட்டமையும் குறிப்பிடத்தக்கது.
 
மேலும் வல்வெட்டித்துறை நகரசபையின் ஆளுகைக்குட்பட்ட தொண்டைமானாறு செல்வச்சந்நிதி ஆலய சூழலில் அமைந்துள்ள உணவகம் ஒன்றிற்கு எதிராக  வல்வெட்டித்துறை நகரசபையின் பொது சுகாதார பரிசோதகரால் உடல்நலத்தகுதியை உறுதிப்படுத்தும் மருத்துவ சான்றிதழ் இல்லாமல் ஊழியர்களை உணவகத்தில் அனுமதித்தமை, உணவகத்தில் கடமை புரியும் ஊழியர்கள் தனிநபர் சுகாதாரம் பேணாமை, இலையான் பெருக இடமளித்தமை, குடிப்பதற்கும் சுத்திகரிப்பிற்கும் பயன்படும் நீரானது குடிக்கத்தக்கது என உறுதி செய்ய தவறியமை, உணவகத்தினை வதிவிடமாக பயன்படுத்தியமை, போன்ற குற்றச்சாட்டுகளிற்கு எதிராக தாக்கல் செய்யப்பட்ட வழக்கானது  இன்றையதினம் விசாரணையின் பின்  (2025.08.22) பருத்தித்துறை நீதவான் நீதிமன்றத்தினால் எச்சரிக்கை செய்யப்பட்டு 25000 தண்டப்பணம் விதிக்கப்பட்டமை குறிப்பிடத்தக்கது.