மத்திய குழு தீர்மானத்தை நியாயப்படுத்தும் தமிழரசு கட்சி: பொது செயலாளர் விளக்கம்

.

தமிழரசுக் கட்சி மத்திய குழுத் தீர்மானம் என்பது கூட்டு தீர்மான் என அக்கட்சியின் பொதுச் செயலாளர் ப.சத்தியலிங்கம் தெரிவித்துள்ளார்.

தமிழரசுக் கட்சியின் மத்திய குழு சஜித் பிரேமதாசவிற்கு ஜனாதிபதி தேர்தலில் ஆதரவு வழங்க தீர்மானித்துள்ளதாக கட்சியின் ஊடகப் பேச்சாளர் தெரிவித்துள்ளார்.

எனினும், தமிழரசுக் கட்சி தலைவர் மாவை சேனாதிராஜா அதற்கு மறுப்பு தெரிவித்து அது கட்சியின் தீர்மானம் இல்லை என தெரிவித்துள்ளார்.

இது தொடர்பில் கட்சியின் செயலாளரை தொடர்பு கொண்டு கேட்ட போதே அவர் இவ்வாறு தெரிவித்தார்.

தமிழரசுக் கட்சியின் மத்திய குழுக் கூட்டத்தில் மாவை சேனாதிராஜா கலந்து கொள்ளவில்லை.

மத்திய குழுத் தீர்மானம் என்பது ஒரு கூட்டுத் தீர்மானம். மத்திய குழுவில் 30 பேர் கலந்து கொண்டார்கள்.

மாவை சேனாதிராஜாவுக்கும் அறிவித்து அவரும் வருவதாக இருந்தார். எனினும், உடல் நிலை சரியில்லை என்று தெரிவித்து அவர் கலந்து கொள்ளவில்லை.

மூத்த துணைத் தலைவர் தலைமையில் தான் கூட்டம் நடைபெற்றது. சஜித் பிரேமதாசவிற்கு ஆதரவு வழங்க வேண்டும் என்பது மத்திய குழு எடுத்த தீர்மானம்.

அதனையே அறிவித்தோம். எதிர்வரும் நான்காம் திகதி தபால் மூல வாக்களிப்பு. அதனால் தீர்மானம் எடுக்கப்பட்டது.

இந்த விடயம் தொடர்பில் மூத்த துணைத்தலைவர், மாவை சேனாதிராஜாவை யாழ்ப்பாணத்தில் பேசுவார் என தெரிவித்துள்ளார்.

இதேவேளை, சஜித் பிரேமதாசவை ஆதரிக்க மேற்கொண்ட தீர்மானத்தில் எந்த சிக்கலும் இல்லை என இலங்கைத் தமிழரசுக் கட்சி அறிவித்துள்ளது.

இது குறித்து கட்சியின் சிரேஷ்ட துணைத் தலைவர் சீ.வி.கே.சிவஞானம் கருத்து வெளியிடுகையில்,

மத்தியகுழு கூட்டத்தில் பங்கேற்க முடியாது என்பதை மாவை சேனாதிராஜா முன்கூட்டியே அறிவித்திருந்ததாகத் தெரிவித்திருந்தார்.

அத்துடன் கட்சியின் யாப்பின் பிரகாரம் மத்திய செயற்குழு கூட்டத்துக்குத் தேவையான கோரம் இருந்ததாகவும், ஆகையினால், இந்தத் தீர்மானத்தில் எந்த சிக்கலும் இல்லை.

தீர்மானம் ஒன்றை எடுக்கத் தமிழரசுக் கட்சியின் யாப்பின் படி மத்திய செயற்குழு கூட்டத்தில் குறைந்தபட்சம் 11 பேர் இருக்க வேண்டும். நேற்றைய கூட்டத்தில் 26 பேர் இருந்ததாகவும் அவர் மேலும் தெரிவித்துள்ளார்.