பிரான்ஸின் சமூகப் பாதுகாப்புத் திட்டம் "Sécurité sociale" இன்று தனது 80-வது பிறந்தநாளைக் கொண்டாடுகிறது!
பிரான்சில் முன்னணி தொழிற்சங்கங்களில் ஒன்றான 'Force Ouvrière' (FO) வெளியிட்ட கட்டுரையின் தமிழாக்கம்.
"Sécurité sociale" (சமூகப் பாதுகாப்புத் திட்டம்) இன்று தனது 80-வது பிறந்தநாளைக் கொண்டாடுகிறது இதனை முன்னிட்டு பிரான்சில் முன்னணி தொழிற்சங்கங்களில் ஒன்றான 'Force Ouvrière' (FO) வெளியிட்ட கட்டுரையின் தமிழாக்கம்
80 வயது 'இளம் மங்கை': பிரான்ஸின் சமூகப் பாதுகாப்புத் திட்டம் - பெருமிதங்களும், பேராபத்துகளும்!
எண்பது வயது. ஒரு வயதான பெண்மணி. ஆனாலும், எங்கள் 'செக்யூ' (Sécu - சமூகப் பாதுகாப்புத் திட்டம்) இன்றுபோல் ஒருபோதும் நவீனமாக இருந்ததில்லை. இந்த அமைப்பு, பிரான்ஸின் மீது உலகம் பொறாமை கொள்ள ஒரு முக்கியக் காரணம். இதுவே அனைத்து நெருக்கடிகளிலிருந்தும் எங்களைக் காக்கும் மாபெரும் அரண்.
ஒவ்வொரு பிரெஞ்சு குடிமகனின் அன்றாட வாழ்விலும், அவர்கள் அறியாமலேயே இந்த அமைப்பு இரண்டறக் கலந்துள்ளது. மருத்துவரைச் சந்தித்துவிட்டு வெளியே வரும்போது நம்மில் எத்தனை பேர் 'செக்யூ'வைப் பற்றி நினைக்கிறோம்? வங்கிக் அட்டையை (Credit Card) தேடுவதற்குப் பதில், நமது 'கார்த் விதால்' (Carte Vitale - சுகாதார அட்டை) அட்டையை இயந்திரத்தில் வைத்து, ஒரு யூரோ கூடக் கொடுக்காமல் மருந்தகத்தை விட்டு வெளியேறுகிறோம். அப்போது அந்த மருந்துகளின் உண்மையான விலை என்னவாக இருக்கும் என்று நாம் சிந்திக்கிறோமா? ஆம், அங்கேதான் 'செக்யூ' கண்ணுக்குத் தெரியாமல் நமக்காக நிற்கிறது.
நோய், குடும்பம், ஓய்வுக்காலம், தொழில் விபத்துகள் என நம் வாழ்வின் ஒவ்வொரு கட்டத்திலும் அது நம்முடன் இருக்கிறது. நமது வசதிக்கேற்ப நாம் பங்களிக்கிறோம், நமது தேவைக்கேற்ப அதைப் பயன்படுத்திக்கொள்கிறோம்.
சிதைக்கப்பட்ட அசல் திட்டம் - தொழிற்சங்கத்தின் எச்சரிக்கை
ஆனால், இந்த அமைப்பின் ஆன்மாவாக விளங்கிய அதன் நிதி ஆதாரம் இன்று சிதைக்கப்பட்டுள்ளது என்பதுதான் எங்கள் கவலை. தொடக்கத்தில், ஊழியர்கள் மற்றும் நிறுவனங்கள் செலுத்தும் 'பங்களிப்புகள்' (Cotisations) மூலமே இத்திட்டம் இயங்கியது. ஆனால் இன்றோ, அந்தப் பங்களிப்புகள் திட்டத்தின் பாதிச் செலவைக்கூட ஈடுகட்டுவதில்லை.
மீதிப் பணம், மக்களின் 'வரிகள்' (Impôts) மூலம் அரசாங்கத்தால் நிரப்பப்படுகிறது. இதுதான் இந்த அமைப்பையே சிதைக்கும் செயல். ஏனென்றால், பங்களிப்பு என்பது உரிமைகளை உருவாக்குகிறது. ஆனால், வரி என்பது அரசியல் தேர்வுகளுக்கு உட்பட்டது.
இதை நாம் இன்று தெளிவாகக் காண்கிறோம். "போர் சார்ந்த பொருளாதாரத்திற்கு நிதியை ஒதுக்குவதா அல்லது சமூக நலனுக்கு ஒதுக்குவதா?" என்ற விவாதம் எழும்போதெல்லாம், அரசியல்வாதிகளின் தேர்வுக்கு வரிப்பணம் ஆளாகிறது.
இதன் விளைவாக, மக்கள் மும்முனைத் தாக்குதலுக்கு ஆளாகிறார்கள்:
ஒருபுறம், நாங்கள் எங்கள் பங்களிப்பைச் செலுத்துகிறோம்.
மறுபுறம், பெரு நிறுவனங்களுக்கு அளிக்கப்படும் 80 பில்லியன் யூரோக்கள் பங்களிப்புச் சலுகைகளை ஈடுகட்ட, எங்கள் வரிப்பணத்தைக் கொண்டு அரசை நிரப்புகிறோம்.
மூன்றாவதாக, மருத்துவச் செலவுகளில் திருப்பிக் கிடைக்கும் தொகை குறைப்பு (baisses de remboursements), மருத்துவக் கட்டணங்கள் (franchises médicales) என 'செக்யூ' மீதான செலவுக் குறைப்புகளையும் நாங்களே சுமக்கிறோம்.
எங்கள் நிலைப்பாடு
இதனால்தான், 'Force Ouvrière' தொழிற்சங்கம் தொடக்க கால சமூகப் பாதுகாப்புத் திட்டத்தை ஒரு உண்மையான சமூகத் தேர்வாகப் பாதுகாக்க விரும்புகிறது. 'பங்களிப்பு' என்பது வெறும் பணம் அல்ல; அது 'ஒத்திவைக்கப்பட்ட சம்பளம்' (salaire différé). அதாவது, தொழிலாளி உழைத்துச் சம்பாதித்த பணத்தின் ஒரு பகுதி, அவனது எதிர்காலப் பாதுகாப்புக்காக ஒதுக்கப்படுகிறது. அது உரிமைகளை உருவாக்குகிறது.
1945-ல் இந்தத் திட்டம் உருவாக்கப்பட்டபோது, "வசதி படைத்தவர்களின் வருமானத்திலிருந்து ஒரு பகுதியை எடுத்து, தொழிலாளர்கள் மற்றும் பின்தங்கிய குடும்பங்களின் வளத்தை மேம்படுத்த வேண்டும்" என்றே கூறப்பட்டது. "ஒவ்வொருவரும் தத்தமது வசதிக்கேற்ப பங்களிக்கிறார்கள், தத்தமது தேவைக்கேற்பப் பெற்றுக்கொள்கிறார்கள்" என்ற தத்துவத்தின் அடித்தளம் இதுவே.
இந்த 80 வயது நவீனப் பெண்மணியை, எங்கள் சமூகக் குடியரசின் தூணை, நாங்கள் ஆண்டு முழுவதும் கொண்டாடுவோம்; பாதுகாப்போம். ஏனென்றால், இந்த அமைப்பு அரசின் கட்டுப்பாட்டை அதிகரிக்கும் தொடர் தாக்குதல்களுக்கு உள்ளாகி வருகிறது. நாங்கள், 'Force Ouvrière' தொழிற்சங்கத்தின் உறுப்பினர்கள், ஒவ்வொரு நாளும் இந்தச் சமூகப் பாதுகாப்புத் திட்டத்திற்காகப் போராடுகிறோம். சுருக்கமாகச் சொன்னால், "நாங்களே சமூகப் பாதுகாப்பு."
எழுதியவர்: எரிக் கோட்ரோன் (ERIC GAUTRON)
பதவி: சமூகப் பாதுகாப்புத் துறைக்கான கூட்டமைப்புச் செயலாளர், Force Ouvrière.
சிவா சின்னப்பொடி.
