டிரம்ப்பின் விமர்சனங்களுக்கு மக்ரோனின் பதிலடி!

அமெரிக்காவின் தன்னிச்சையான முடிவுகளுக்குக் கண்டனம்.

மத்திய கிழக்குப் போர் விவகாரத்தில் பிரான்ஸ் போதிய ஒத்துழைப்பு வழங்கவில்லை என அமெரிக்க அதிபர் டொனால்ட் டிரம்ப் அண்மையில் கடுமையாக விமர்சித்திருந்தார். இதற்குப் பதிலடி கொடுக்கும் விதமாக, பிரான்ஸ் அதிபர் இம்மானுவேல் மக்ரோன் (Emmanuel Macron) ஜப்பான் தலைநகர் டோக்கியோவில் வைத்துப் பரபரப்பான கருத்தொன்றைப் பதிவு செய்துள்ளார்.

அமெரிக்காவின் தன்னிச்சையான முடிவுகளுக்குக் கண்டனம்
ஐரோப்பிய நாடுகளின் கொள்கைகள் எப்போதும் "முன்கூட்டியே கணிக்கக்கூடியவை" (Prévisibilité) என்றும், ஆனால் அமெரிக்காவின் தற்போதைய செயல்பாடுகள் முற்றிலும் "கணிக்க முடியாதவை" (Imprévisibilité) என்றும் டிரம்ப்பின் பெயர் குறிப்பிடாமல் மக்ரோன் கடுமையாகச் சாடியுள்ளார்.  உலகப் பொருளாதாரத்தில் பெரும் தாக்கத்தை ஏற்படுத்தக்கூடிய மத்திய கிழக்குப் போரை, தங்கள் நட்பு நாடுகளுக்கு எவ்வித முன்னறிவிப்பும் கொடுக்காமல் அமெரிக்கா தன்னிச்சையாகத் தொடங்கியுள்ளதை அதிபர் மக்ரோன்மறைமுகமாகக் கண்டித்துள்ளார்.

தனது ஜப்பான் பயணத்தின் இரண்டாம் நாளான இன்று (ஏப்ரல் 1, புதன்கிழமை), டோக்கியோவில் கூடியிருந்த முன்னணி ஜப்பானியத் தொழிலதிபர்கள் மற்றும் முதலீட்டாளர்கள் மத்தியில் அதிபர் மக்ரோன்உரையாற்றினார்.
அப்போது அவர் கூறியதாவது:
"மற்ற கண்டங்களை விட ஐரோப்பா சற்று மெதுவாகச் செயல்படுவதாகச் சிலர் நினைக்கலாம் என்பதை நான் நன்கு அறிவேன். ஆனால், எங்கள் கொள்கைகள் மற்றும் முடிவுகளின் முன்கூட்டியே கணிக்கக்கூடிய தன்மைக்கு (Prévisibilité) ஒரு தனி மதிப்பு உள்ளது. கடந்த சில ஆண்டுகளாகவே, குறிப்பாகக் கடந்த சில வாரங்களாக நிலவும் பதற்றமான சூழலிலும் எங்கள் நிலைப்பாடு மாறவில்லை என்பதை நாங்கள் நிரூபித்துள்ளோம். நாங்கள் எந்தப் பாதையில் பயணிக்கிறோம் என்பது உலகிற்குத் தெளிவாகத் தெரியும்."

தொடர்ந்து பேசிய அவர், டிரம்ப்பின் நிலையற்ற முடிவுகளைக் கடுமையாக விமர்சித்தார்: "தற்போதைய காலகட்டத்தில் எங்களின் இந்தச் சீரான தன்மை மிகவும் சிறப்பானது என்பதை நம்புங்கள். ஆனால், 'நாங்கள் மிக வேகமாகச் செயல்படுகிறோம்' என்று மார்தட்டிக்கொள்பவர்கள், நாளை மறுநாள் அதே நிலைப்பாட்டில்தான் இருப்பார்களா என்பது யாருக்கும் தெரியாது. அல்லது, எவ்வித முன்னறிவிப்புமின்றி உங்களைக் கடுமையாகப் பாதிக்கும் வகையிலான ஒரு முடிவை அவர்கள் நாளைக்கே கூட எடுக்கலாம்."  மத்திய கிழக்குப் போரால் உலக நாடுகள் பொருளாதார ரீதியாகப் பாதிக்கப்பட்டுள்ள சூழலில், பிரான்ஸ் அதிபரின் இந்த வெளிப்படையான விமர்சனம் சர்வதேச அரசியல் களத்தில் பெரும் முக்கியத்துவம் பெற்றுள்ளது.  

- சிவா சின்னப்பொடி