பாரிஸில் தென்னாப்பிரிக்க தூதர் ஹோட்டல் மாடியிலிருந்து குதித்து தற்கொலை!

நடந்தது என்ன?இந்தத் திடீர் மற்றும் துயரமான முடிவுக்கான காரணம் என்ன என்பது குறித்து பல கேள்விகள் எழுந்துள்ளது!

பாரிஸில் உள்ள நட்சத்திர ஹோட்டல் ஒன்றின் 22வது மாடியிலிருந்து குதித்து, பிரான்சுக்கான தென்னாப்பிரிக்க தூதர் தற்கொலை செய்துகொண்ட சம்பவம் பெரும் அதிர்ச்சியையும், பரபரப்பையும் ஏற்படுத்தியுள்ளது.
தென்னாப்பிரிக்காவின் முக்கிய அரசியல்வாதியும், பிரான்சுக்கான தூதருமான திரு. நோசினதி இம்மானுவேல் மெத்வா (Nkosinathi Emmanuel Mthethwa) என்பவரே உயிரிழந்தவர் எனப் பாரிஸ் அரசு வழக்கறிஞர் அலுவலகம் உறுதி செய்துள்ளது.
** நடந்தது என்ன?**
திங்கட்கிழமை முதல் திரு. மெத்வா காணாமல் போனதாக அவரது மனைவி காவல் நிலையத்தில் புகார் அளித்திருந்தார். திங்கட்கிழமை மாலை 4:30 மணியளவில் ஒரு நிகழ்ச்சிக்காகப் புறப்பட்டுச் சென்ற தனது கணவரை அதன் பிறகு காணவில்லை என்றும், அவரிடமிருந்து கவலையளிக்கும் வகையில் ஒரு குறுஞ்செய்தி வந்ததாகவும் அவர் தெரிவித்திருந்தார்.
இந்நிலையில், நேற்று காலை பாரிஸின் 17வது மாவட்டத்தில் உள்ள புகழ்பெற்ற Hyatt Regency  ஹோட்டலின் முற்றத்தில் திரு. மெத்வாவின் உடல் கண்டெடுக்கப்பட்டது. முதற்கட்ட விசாரணையில், அவர் தங்கியிருந்த 22வது மாடி அறையின் பாதுகாப்பு ஜன்னலை உடைத்து கீழே குதித்து தற்கொலை செய்துகொண்டிருக்கலாமெனத் தெரியவந்துள்ளது.
58 வயதான திரு. மெத்வா, பிப்ரவரி 2024-ல் பிரான்சுக்கான தென்னாப்பிரிக்க தூதராகப் பொறுப்பேற்றார். மேலும், யுனெஸ்கோவிற்கான தென்னாப்பிரிக்காவின் நிரந்தரப் பிரதிநிதியாகவும் அவர் பணியாற்றி வந்தார்.
இந்தச் சம்பவம் தற்கொலையாகவே தோன்றினாலும், மரணத்திற்கான உண்மையான காரணங்களைக் கண்டறிய பாரிஸ் காவல்துறை தீவிர விசாரணையைத் தொடங்கியுள்ளது. இந்தத் திடீர் மற்றும் துயரமான முடிவுக்கான காரணம் என்ன என்பது குறித்து பல கேள்விகள் எழுந்துள்ள நிலையில், விசாரணை தொடர்ந்து நடைபெற்று வருகிறது.

சிவா சின்னப்பொடி