நீரிழிவில் புதிதாக அங்கீகரிக்கப்பட்ட 'வகை 5' - அதிர்ச்சித் தகவல்!
இந்த "புதிய" வகை நீரிழிவு உண்மையில் 70 ஆண்டுகளுக்கு முன்பே மருத்துவ உலகில் கவனிக்கப்பட்டுள்ளது.
நீரிழிவில் புதிதாக அங்கீகரிக்கப்பட்ட 'வகை 5' - அதிர்ச்சித் தகவல்!
நீரிழிவு நோய் என்றாலே, நம்மில் பலருக்கு உடல் பருமன் (Type 2) அல்லது குழந்தைப் பருவத்தில் வரும் (Type 1) நோய் என்பதுதான் தெரியும். ஆனால், இப்போது முற்றிலும் மாறுபட்ட ஒரு புதிய நீரிழிவு வகையைச் சர்வதேச நீரிழிவு சம்மேளனம் (FID) அதிகாரப்பூர்வமாக அங்கீகரித்துள்ளது. அதற்கு "வகை 5 நீரிழிவு" (Type 5 Diabetes) என்று பெயரிடப்பட்டுள்ளது. ஆச்சரியமூட்டும் வகையில், இந்த வகை நீரிழிவு உடல் பருமனால் அல்ல, மாறாக ஊட்டச்சத்துக் குறைபாடு (Malnutrition) மற்றும் மிகவும் மெலிந்த உடல்வாகு (underweight) காரணமாக ஏற்படுகிறது. 2025-ம் ஆண்டு, பாங்காக்கில் நடந்த உலக நீரிழிவு மாநாட்டில் இந்த அங்கீகாரம் வழங்கப்பட்டுள்ளது.
வழக்கமான நீரிழிவு வகைகளுக்கும் இதற்கும் உள்ள முக்கிய வேறுபாடு இதுதான்:
டைப் 2 நீரிழிவு (Type 2): பொதுவாக, உடல் பருமன் மற்றும் இன்சுலின் எதிர்ப்புத்திறன் (Insulin Resistance) காரணமாக ஏற்படுகிறது. புதிய டைப் 5 (Type 5): இதற்கு நேர்மாறாக, இது ஊட்டச்சத்துக் குறைபாடு உள்ளவர்களிடம் காணப்படுகிறது. பாதிக்கப்பட்ட நோயாளிகள் பெரும்பாலும் மிகவும் மெலிந்து, எடை குறைவாக இருப்பார்கள்.
வித்தியாசமான செயல்பாடு: 2022-ல் நியூயார்க்கில் நடந்த ஒரு ஆய்வில், இந்த நோயாளிகளுக்கு இன்சுலின் எதிர்ப்பு (Type 2 போல) ஏற்படுவதற்குப் பதிலாக, இன்சுலின் சுரப்பதிலேயே குறைபாடு (Defect in insulin secretion) இருப்பது கண்டறியப்பட்டது.
உலகளவில் சுமார் 2.5 கோடி (25 மில்லியன்) மக்கள் இந்த வகை 5 நீரிழிவால் பாதிக்கப்பட்டுள்ளதாக மதிப்பிடப்பட்டுள்ளது.
பாதிக்கப்பட்டவர்களில் பெரும்பாலோர் உலகின் ஏழை நாடுகளில் வசித்து வருகின்றனர். இது பெரும்பாலும் 30 வயதிற்குட்பட்ட இளைஞர்களையே அதிகம் தாக்குகிறது.
70 ஆண்டுகால தாமதமான அங்கீகாரம்!
இந்த "புதிய" வகை நீரிழிவு உண்மையில் 70 ஆண்டுகளுக்கு முன்பே மருத்துவ உலகில் கவனிக்கப்பட்டுள்ளது.
1955: முதன்முதலில் ஜமைக்காவில், மருத்துவர் ஹேக் சமான நீரிழிவு நோயாளிகளைக் கண்டறிந்தார்.
1965 (10 ஆண்டுகளுக்குப் பின்): இந்திய விஞ்ஞானிகள்தான் (ஒடிசா மாநிலத்தில்) முதன்முதலில் இதற்கும் ஊட்டச்சத்துக் குறைபாட்டிற்கும் தொடர்பு இருக்கலாம் என்று சுட்டிக்காட்டினர்.
1985: உலக சுகாதார அமைப்பு (WHO) இதை "ஊட்டச்சத்துக் குறைபாடு நீரிழிவு" என்று வகைப்படுத்தியது.
1999: ஆனால், சில ஆண்டுகளுக்குப் பிறகு, ஊட்டச்சத்துக் குறைபாடுதான் இதற்கு நேரடிக் காரணம் என்பதற்குப் போதுமான ஆதாரம் இல்லையெனக் கூறி, WHO அந்தப் வகைப்பாட்டை நீக்கியது.
2025: பல தசாப்த கால தொடர் ஆராய்ச்சிக்குப் பிறகு, இப்போது இது 'டைப் 5' என அதிகாரப்பூர்வமாக மீண்டும் ஏற்றுக்கொள்ளப்பட்டுள்ளது.
இதற்கு முன், டைப் 1 (ஓட்டோ இம்யூன்), டைப் 2 (பெரியவர்களிடம்), கர்ப்பகால நீரிழிவு (Gestational) மற்றும் MODY (மரபணு) என நான்கு வகைகள் மட்டுமே அங்கீகரிக்கப்பட்டிருந்தது குறிப்பிடத்தக்கது
