அபார முன்னிலை பெற்ற முன்னாள் பிரதமர்! ஆனால், அவருக்கே வாக்குப்போட முடியாத சுவாரஸ்யம்!
பாரிஸ் அரசியல் களத்தில் திடீர் திருப்பம், மிஷேல் பார்னியர் தனக்கே ஓட்டுப்போட முடியவில்லை!
பாரிஸ், செப்டம்பர் 22: பிரான்சின் ஐந்தாவது குடியரசு வரலாற்றில் மிகக் குறுகிய காலம் பிரதமராகப் பதவியிலிருந்த மிஷேல் பார்னியர், பாரிஸ் இடைத்தேர்தலில் யாரும் எதிர்பாராத வகையில் அபார முன்னிலை பெற்று அரசியல் களத்தில் மீண்டும் ஒரு அதிர்வலையை ஏற்படுத்தியுள்ளார். ஆனால், இந்த வெற்றியின் பின்னே உள்கட்சிப் பூசல்களும், சுவாரஸ்யமான சர்ச்சைகளும் நிறைந்துள்ளன.
பாரிஸின் 2வது தொகுதிக்காக நேற்று (செப். 21) நடைபெற்ற இடைத்தேர்தலின் முதல் சுற்றில், வலது சாரிக் கட்சியான லே ரிப்புப்ளிக்கன் (LR) கட்சியின் வேட்பாளரான மிஷேல் பார்னியர், 45%க்கும் அதிகமான வாக்குகளைப் பெற்று முதலிடத்தைப் பிடித்துள்ளார். இதன் மூலம், வரும் செப்டம்பர் 28ஆம் திகதி நடைபெறவுள்ள இறுதிச் சுற்றில், சோசலிசக் கட்சியின் வேட்பாளரான ஃப்ரெடெரிக் ப்ரெடினை அவர் எதிர்கொள்வது உறுதியாகியுள்ளது. இந்த வெற்றி பார்னியருக்கு இனிப்பானதாக இருந்தாலும், அதற்கான பாதை சர்ச்சைகள் நிறைந்ததாகவே இருந்தது
பாரிஸின் செல்வாக்கு மிக்க நகர முதல்வர்களில் ஒருவரான ரஷிதா டாட்டி, பார்னியரின் வேட்புமனுவால் கடும் கோபமடைந்தார். "பார்னியருக்கு பாரிஸ் உடன் எந்தத் தொடர்பும் இல்லை, அவரது உண்மையான இலக்கு 2026 மாநகராட்சி நகர முதல்வர் தேர்தல்தான்" என்று வெளிப்படையாகக் குற்றம் சாட்டினார். அவரை எதிர்த்துப் போட்டியிடப் போவதாகவும் மிரட்டல் விடுத்திருந்தார்.
சொந்தமாக ஓட்டுப்போட முடியவில்லை: இந்தத் தேர்தலின் உச்சகட்ட சுவாரஸ்யம் என்னவென்றால், மிஷேல் பார்னியர் தனக்கே ஓட்டுப்போட முடியவில்லை! ஏனென்றால், அவரது பெயர் பாரிஸ் வாக்காளர் பட்டியலில் பதியப்படவில்லை. சவோயா பகுதியைத் தனது அரசியல் களமாக வைத்திருந்த அவர், கடந்த 12 ஆண்டுகளாக இந்தத் தொகுதியில் வசிப்பதாகக் கூறினாலும், வாக்காளர் பட்டியலில் பெயரைச் சேர்க்கவில்லை. இதனால், நேற்று ஒரு நண்பரின் பதிலாள் வாக்கு (Proxy Vote) மூலமாகவே தனது வாக்கைப் பதிவு செய்தார்.
இந்தத் தேர்தலில் பார்னியர் வெற்றி பெற்றால், தலைநகர் பாரிஸில் லே ரெப்புப்ளிக்கன் கட்சிக்குக் கிடைக்கும் ஒரேயொரு நாடாளுமன்ற உறுப்பினர் என்ற பெருமையை அவர் பெறுவார். இது அக்கட்சிக்குப் பெரும் பலமாக அமையும்.
75% வாக்காளர்கள் வாக்களிக்க வராத இந்தத் தேர்தலில், முன்னாள் பிரதமர் பெற்ற இந்த அபார முன்னிலை, இறுதிச் சுற்றுக்கான எதிர்பார்ப்பை எகிற வைத்துள்ளது. அனுபவம் வாய்ந்த ஃப்ரெடெரிக் ப்ரெடினை அவர் வீழ்த்துவாரா? பாரிஸ் அரசியல் களம் சூடுபிடித்துள்ளது!
