சிறிலங்காவின் வடகிழக்கில் சுயநிர்ணய உரிமையின் அடிப்படையில் பொதுவாக்கெடுப்பு!

“போரினால் பாதிக்கப்பட்ட அல்லது அச்சுறுத்தலுக்குள்ளான பகுதிகளில் நிலையான அமைதியை உறுதிப்படுத்துவோம்"

சிறிலங்காவின் வடகிழக்கில் சுயநிர்ணய உரிமையின் அடிப்படையில் பொதுவாக்கெடுப்பை நடத்துமாறு அமைதிச் சபையிடம் (Board of Peace) நாடுகடந்த தமிழீழ அரசாங்கம் கோரிக்கை!!!
நாடுகடந்த தமிழீழ அரசாங்கம் (TGTE), அமைதிச் சபையின் தலைவரான அதிபர் டொனால்ட் டிரம்ப் அவர்களுக்கு உத்தியோகபூர்வமாக கடிதம் ஒன்றை எழுதியுள்ளது. அதில், ஈழத் தமிழர்களின் சுயநிர்ணய உரிமையின் அடிப்படையில் சிறிலங்கா தீவின் வடகிழக்குப் பகுதியில் பொதுவாக்கெடுப்பு ஒன்றை நடாத்துமாறு அமைதிச் சபையை (BOP) வலியுறுத்தியுள்ளது.

“போரினால் பாதிக்கப்பட்ட அல்லது அச்சுறுத்தலுக்குள்ளான பகுதிகளில் நிலையான அமைதியை உறுதிப்படுத்துவோம்" என்று உறுதியளித்துள்ள அமைதிச் சபையின் உருவாக்கத்தை வரவேற்றுள்ள நாடுகடந்த தமிழீழ அரசாங்கம், அந்த அமைப்பின் வரம்புகளை நாடுகளுக்கு இடையிலான பிரச்சனைகளுக்கு அப்பால் விரிவுபடுத்தி, அரசுகளுக்கும் அரசற்ற தேசிய இனங்களுக்கும்இடையே நிலவும் பிரச்சனைகளை எதிர்கொள்ளுமாறு அழைப்பு விடுத்துள்ளது.

தனது கடிதத்தில், நாடுகளுக்கு இடையிலான போர்களைத் தடுப்பதிலும், காலனித்துவ நீக்கம் மற்றும் மனித உரிமைகளை மேம்படுத்துவதிலும் ஐக்கிய நாடுகள் சபை ஆற்றிய வரலாற்றுச் சாதனைகளை நாடுகடந்த தமிழீழ அரசாங்கம் அங்கீகரித்துள்ளது. இருப்பினும், தற்போதைய சர்வதேசக் கட்டமைப்பு அடிப்படையில் அரசு-மையவாதமாகவே இருப்பதையும், அது அரசற்ற தேசிய இனங்களின் அர்த்தமுள்ள பங்களிப்பைத் தடுக்கும் கட்டமைப்பு ரீதியான வரம்புகளைக் கொண்டுள்ளதையும் சுட்டிக்காட்டியுள்ளது.

“சர்வதேச அமைப்பின் தோல்வி சிறிலங்காத் தீவில் மிகத் தெளிவாகத் தெரிகிறது" என்று ருத்ரகுமாரன் தெரிவித்துள்ளார். 2009-ஆம் ஆண்டு போரின் இறுதிக்கட்டத்தில் சுமார் 40,000 தமிழ் பொதுமக்கள் கொல்லப்பட்டதாகவும், மேலும் பல்லாயிரக்கணக்கானோர் என்ன ஆனார்கள் என்ற விபரம் தெரியவில்லை என்றும் ஐக்கிய நாடுகள் சபையின் கண்டுபிடிப்புகளையும் அவர் சுட்டிக்காட்டினார். அத்துடன், போரின் இறுதிக்கட்டத்தில் பொதுமக்களைப் பாதுகாப்பதில் ஏற்பட்ட அமைப்பு ரீதியான தோல்விகளை ஒப்புக்கொண்ட ஐக்கிய நாடுகள் சபையின் உள்நோக்கிய மறுஆய்வுக் குழுவின் அறிக்கையையும் (Internal Review Report) அவர் மேற்கோள் காட்டினார்.

போர் முடிந்து பதினாறு ஆண்டுகள் கடந்த பின்னரும், இனப்படுகொலை, மனிதநேயத்திற்கு எதிரான குற்றங்கள் மற்றும் போர்க்குற்றங்களுக்கான பொறுப்புக்கூறல் எட்டப்படாமலேயே உள்ளது. ஒரு கலப்பு நீதிமுறை பொறிமுறைக்கு அழைப்பு விடுத்த 2015-ஆம் ஆண்டின் ஐக்கிய நாடுகள் மனித உரிமைகள் பேரவையின் 30/1 தீர்மானம் ஒருபோதும் நடைமுறைப்படுத்தப்படவில்லை. மாறாக, பல தசாப்தகாலமாக சிறிலங்காவில் வேரூன்றியுள்ள தண்டனையிலிருந்து தப்பிக்கும் போக்கு, பரவலான இனவாதம் மற்றும் கட்டமைப்பு ரீதியான பாகுபாடுகளை நன்கு அறிந்திருந்தும், ஐக்கிய நாடுகள் சபை உள்நாட்டுப் பொறுப்புக்கூறல் பொறிமுறைகளையே பரிந்துரைத்து, பின்வாங்கியுள்ளது.

தற்போதைய சர்வதேச அமைப்பில், இனப்படுகொலை, வலிந்து காணாமல் ஆக்கப்படுதல், சித்திரவதை, பாலியல் வன்முறை மற்றும் ஏனைய அட்டூழிய குற்றங்களால் பாதிக்கப்பட்டவர்களுக்கு நீதி கிடைப்பது என்பது, சர்வதேச விதிகளையோ அல்லது சட்டத்தின் ஆட்சியையோ பொறுத்தது அல்லாமல், பலம் வாய்ந்த அரசுகளின் விருப்பு வெறுப்புகளிலேயே தங்கியுள்ளது என்று நாடுகடந்த தமிழீழ அரசாங்கத்தின் கடிதத்தில் சுட்டிக்காட்டப்பட்டுள்ளது.
பெரும்பான்மைவாத அரசியல் அணுகுமுறைகள் மூலம் நிலையான அமைதியை ஏற்படுத்த முடியாது என்பதை நாடுகடந்த தமிழீழ அரசாங்கம் வலியுறுத்தியுள்ளது. நிலையான அமைதி என்பது சம்பந்தப்பட்ட மக்களின் சுதந்திரமாக வெளிப்படுத்தப்பட்ட விருப்பத்தின் அடிப்படையில் அமைய வேண்டும் என்று அது வாதிட்டது.

அதன்படி, அமைதிச் சபையை பின்வருவனவற்றைச் செய்யுமாறு நாடுகடந்த தமிழீழ அரசாங்கம் கோரியுள்ளது:
•    தமிழ் மக்களை, தங்களது சுயநிர்ணய உரிமையின் அடிப்படையில் ஒரு சுதந்திரமான மற்றும் இறையாண்மை கொண்ட அரசை அமைக்கும் உரிமை கொண்ட ஒரு தேசமாக அங்கீகரித்தல்;
•    தற்போதுள்ள அரசு-மையவாத சர்வதேச அமைப்பின் கட்டமைப்பு ரீதியான வரம்புகளை ஒப்புக்கொள்ளுதல்; மற்றும்
•    தமிழ் தேசம் தனது அரசியல் எதிர்காலத்தை தீர்மானிக்கும் வகையில், புலம்பெயர் தமிழர்களின் பங்களிப்புடன், சிறிலங்காவின் வடகிழக்கு பகுதியில் சுதந்திரமான மற்றும் நீதியான பொதுவாக்கெடுப்பை நடாத்துதல்.

“பொதுவாக்கெடுப்புக்கான தமிழர்களின் கோரிக்கை என்பது வெறும் அரசியல் சார்ந்தது மட்டுமல்ல," என்று ருத்ரகுமாரன் தெரிவித்தார். "இது அடிப்படையில் சர்வதேச சட்டத்தில் வேரூன்றிய ஒரு மனித உரிமைப் பிரச்சினையாகும்."அமைதிச் சபையுடன் ஆக்கபூர்வமாகப் பங்களிக்கவும், தனது நிலைப்பாட்டை ஆதரிக்கும் ஆவணங்களை வழங்கவும் தயாராக இருப்பதாக நாடுகடந்த தமிழீழ அரசாங்கம் தெரிவித்துள்ளது.

“நீதி இல்லாத அமைதி பலவீனமானது. சம்மதம் இல்லாத அமைதி தற்காலிகமானது. ஜனநாயக ரீதியான சுயநிர்ணய உரிமையின் அடிப்படையில் அமைந்த அரசியல் தீர்வு மட்டுமே நிலையான அமைதியை உருவாக்க முடியும்," என்று அது கூறியுள்ளது.