பிரான்சில் ஈழத்தமிழருக்கு நேர்ந்த துயரம்: நீதி கோரிய அமைதிப் பேரணியும், அது எழுப்பும் கேள்விகளும்
இப் பேரணி வெறும் உணர்வுப்பூர்வமான ஒன்றுகூடலாக மட்டுமில்லாமல், பிரெஞ்சு அரசியல் மற்றும் சமூகத் தளத்தில் சில முக்கியமான தாக்கங்களை ஏற்படுத்தியுள்ளது
பிரான்சின் 93-வது பிராந்தியத்தின் (Seine-Saint-Denis) தலைநகரான பொபினி (Bobigny) நகரில் கடந்த 30-ஆம் தேதி நடந்த காவல்துறையினரின் துப்பாக்கிச் சூட்டில், தாயகம் மல்லாவியைச் சேர்ந்த இரண்டு குழந்தைகளின் தந்தையான வைத்திலிங்கம் புவனேஸ்வரன் (குட்டி) அவர்கள் கொல்லப்பட்டார். இந்தச் சம்பவம் பிரான்ஸ் வாழ் தமிழ் மக்களிடையே பெரும் அதிர்ச்சியையும் சோகத்தையும் ஏற்படுத்தியுள்ளது. அவரின் மரணத்திற்கு நீதி கோரி, நேற்று பொபினி நகரில் நடைபெற்ற ‘வெள்ளை அணி அமைதிப் பேரணியில்’ (Marche Blanche) சுமார் ஆயிரம் உணர்வாளர்கள் கலந்துகொண்டு தங்களின் கண்டனத்தையும், நீதிக்கான கோரிக்கையையும் அமைதியான முறையில் பதிவு செய்துள்ளனர்.
இந்தப் பேரணி ஏற்படுத்திய அரசியல் மற்றும் சமூகத் தாக்கங்கள்
இந்தப் பேரணி வெறும் உணர்வுப்பூர்வமான ஒன்றுகூடலாக மட்டுமில்லாமல், பிரெஞ்சு அரசியல் மற்றும் சமூகத் தளத்தில் சில முக்கியமான தாக்கங்களை ஏற்படுத்தியுள்ளது: உள்ளூர் அரசியல்வாதிகளின் நேரடி ஆதரவு: பொபினி நகர முதல்வர் மற்றும் பிரதிநிதிகள், அண்டை நகரமான லாக்கொர்நெவ் (La Courneuve) நகரசபை உபமுதல்வர் ஆகியோர் நேரடியாகக் கலந்து கொண்டது இப்போராட்டத்திற்கு ஒரு வலுவான அரசியல் அங்கீகாரத்தைக் கொடுத்துள்ளது. இது காவல்துறையின் நடவடிக்கைக்கு எதிரான ஒரு மறைமுக அரசியல் அழுத்தமாகும்.
பிராந்திய மட்டத்திலான கவனம்: 93-ஆம் பிராந்தியத்தின் முதல்வர் ஸ்ரிபன் டுரூசல் (Stéphane Troussel) அவர்கள் நேரில் வர முடியாவிட்டாலும், தனது ஆதரவை எழுத்துப்பூர்வமாகத் தெரிவித்துள்ளது மிக முக்கியமான நகர்வாகும். பிரான்சில் சிறுபான்மையினர் மற்றும் புலம்பெயர்ந்தோர் அதிகம் வாழும் இப்பிராந்தியத்தில், காவல்துறையின் அத்துமீறல்கள் குறித்து ஒரு முக்கிய பிராந்தியத் தலைவர் குரல்கொடுப்பது சட்டரீதியான விசாரணையைத் துரிதப்படுத்தும்.
பல்லினச் சமூகங்களின் ஒருங்கிணைப்பு: பிற சமூகங்களைச் சேர்ந்த மக்களும் இந்த அமைதிப் பேரணியில் இணைந்தது, இது தமிழர்களுக்கான தனிப்பட்ட பிரச்சனை மட்டுமல்ல, மாறாக பிரான்சில் வாழும் அனைத்துச் சிறுபான்மை மக்களுக்குமான மனித உரிமைப் பிரச்சனை என்பதைப் பறைசாற்றியுள்ளது. வைத்திலிங்கம் புவனேஸ்வரன் அவர்களின் மரணத்திற்காக நடத்தப்பட்ட இந்த அமைதிப் பேரணி, நீதிக்கான ஒரு தொடக்கப் புள்ளி மட்டுமே. பிரெஞ்சு அரசியல்வாதிகளின் ஆதரவும், பிற சமூகங்களின் பங்களிப்பும் நமக்கு ஒரு பலமான அடித்தளத்தை அமைத்துக் கொடுத்துள்ளன.
எனினும், உரிமைகளை வென்றெடுக்க எண்ணிக்கைப் பலம் மிக அவசியம். நாம் வாழும் நாட்டில், நம் சமூகத்தைச் சேர்ந்த ஒருவருக்கு அநீதி இழைக்கப்படும் போது, நாம் அனைவரும் ஓரணியில் திரள வேண்டியது காலத்தின் கட்டாயம். "நமக்கு வரவில்லை, நாம் ஏன் செல்ல வேண்டும்?" என்ற மனப்பான்மையை மாற்றி, "இன்று அவருக்கு, நாளை நமக்கு" என்ற விழிப்புணர்வோடு தமிழ்ச் சமூகம் ஒன்றுபட்டால் மட்டுமே, பிரான்ஸ் போன்ற ஐரோப்பிய நாடுகளில் நமது இருப்பையும் உரிமைகளையும் பாதுகாப்பாகத் தக்கவைத்துக் கொள்ள முடியும்.-
சிவா சின்னப்பொடி
